Tajau

Tajau sebengkah ari kereban lama bansa Iban ti suah bisi ba sesebuah ruang bilik. Tajau mega dikembuan bansa-bansa bukai ba Borneo baka Kadazan, Dusun, Murut enggau bansa Dayak ke bukai.

Sejarah enggau Guna

Nitihka pansik, tajau berengkah bisi di menua kitai ba Borneo tu kenyau ari abad ke-12 iya nya lebuh pedagang ari menua China datai di menua kitai. Dulu menya, tajau dikena nukar barang baka beras, padi, sayur, telu masin, garam, gula enggau mayuh agi barang ke guna kitai besehari-sehari.

Kelimpah ari nya, raban bansa lban mega bulih tajau ari sida bujang berani ke mai tajau pulai ke menua sepengudah ngayau. Tajau tu suah dikena lebuh maya ngintu pengawa Gawai Kenyalang. Tajau ke bansa tu dipelabaka bisi semengat sereta mai tuah ngagai orang ke beempuiya. Nya kebuah, tajau bansa tu enda tau enda diintu sereta diberi makai. Enti intu enda chukup, dia iya tau mai pemedis ngagai orang ke nguan bilik ti ngempu iya.

Sekeda bansa tajau ti pemadu berega ba bansa lban iya nya tajau Segiu, Ningka, Menaga, Betanda, Rusa, Pantar Rusa Alas, Salang-alang, Pereni, Lambing enggau ti bukai.

Nyimpan utai tanam

Kelia, tajau suah dikena nyimpan padi, beras, tuak enggau barang berega baka emas, gari enggau ngepan asal lban. Nyau kelama-lama bansa Iban ngasaika tajau tu sebengkah ari pesaka ke berantu lalu sida arapka tajau ngembuan semengat baka utai idup. Nya alai, iya lalu nyadi reta ke berega sereta kereban ti beguna kelebih agi ba pengawaritual baka nyadika sabang ngagai manang ba pengawa merubat.

Nyimpan bangkai orang ke mati

Tajau mega nyadika baya sereta kelai lubang orang ke mati. Pia mega iya dikena ba pengawa ngerapuh bangkai iya nya pengawa ke ngintu pemati orang ke enda temu bangkai tang iya udah ditemu lesi laya sulai. Nyadi, tajau nya mih ganti tubuh iya ti udah parai lalu disenggai sebedau ditumbakka ba pendam.

Sebedau bisi undang-undang menua ke nyadi lalau kitai kemaya hari tu, tajau dikena mayar ukum nitihka Adat Tusun Tunggu. Suah agi, atur ke begunaka tajau dikena mayar ukum tunggu nya bekaul enggau penyalah berat baka penyalah munuh, enchuri, ngerusak reta enggau umai orang sereta penyalah bukai ti ngelanggar adat enggau penti pemali. Enti orang ditemu ngereja penyalah munuh, iya dipinta mayar tunggu ngena tajau ke tanda adat pati nyawa.

Dulu kelia, tajau mega dikena ngambi ulun orang bukai ti deka diambu kitai ke diri sebilik nengah adat nembang ulun. Kelimpah ari nya mega, iya nyadika derian maya jadi melaki bini sereta nyadi pemai orang ke bebini tauka belaki nguai.