Meme Internet

Meme Internet, tauka semina meme (/miːm/), iya nya utai budaya (baka penemu, ulah, tauka gaya) ti dikerembaika nengah Internet, suah agi nengah pelasar media rama, baka YouTube, Twitter, Reddit etb. Meme Internet tau ngambi mayuh macham tukuh, baka gambar, video, GIF, enggau mayuh macham sensasyen viral bukai. Ciri-ciri meme nyengkaum mudah kena parodi, ngena intertekstualiti, ngerembai dalam pola viral, enggau evolusyen ari maya ke maya. Nama tu datai ari konsep meme ti diperambu Richard Dawkins dalam taun 1972.

Mike Godwin nempa leka jaku meme Internet maya 1993 lebuh iya berandauka meme baka ti ngerembai nengah papan pesan, raban Usenet, enggau email. Enggau pemansang platform media rama baka YouTube, Twitter, Facebook, enggau Instagram, meme udah mayuh macham sereta ulih ngerembai enggau jampat. Genre ke baru agi nyengkaum meme “dank” enggau surrealist, sereta mega video ke pandak baka ke diupload ba Vine enggau TikTok.

Meme dianggap nyadi sebagi ari budaya Internet ti beguna, lalu udah nyadi bidang pansik ti mansang. Sida tu ayan dalam mayuh macham konteks, baka pemasaran, ekonomi, pekara wang, politik, gerak balas sosial, pengarap, enggau nyaga pengerai. Taja pan bisi sekeda madahka meme patut dijaga ngena chara ti lurus, ngena media ari asil ti udah bisi sebedau tu kekadang tau ngujungka isu enggau hak cipta.